guito-n-logo

محمد الڤيتوني من الرابورات القلال في تونس اللي يغنوا النوع هذا من الراب، الكونشيس راب.. عنده غنايات من نفس هذا التمشي كيف “ارماڤيدون” و “البرهان 1 و 2” و “تخلف”… يتشابه برشا مع “بسيكو آم” (رغم بعض الاختلاف في المواضيع)…

الفورمة:

في أول الغناية فما مجاهد من مجاهدي سوريا التوانسة يتهدد على رئيس الجمهورية “المنصف المرزوقي” و ينعته بأنبى النعوت و يتوعده بالرجوع إلى تونس و تطهيرها و تحريرها..
الموسيقى ڤارحة فيها شبه بالموسيقى المستعملة في الڤانڤستا راب (رغم ان هذا النوع من الراب موش ڤانڤستا راب)…
من ناحية كتابة النص، فما كتابة عمودية للبارولات بحيث القافية واضحة في نهاية كل سطر..

الميساج:

كلمات الغناية موجودين في الرابط هاذا وفي آخر الأرتيكل

الميساج في الغناية واضح ضد المتشددين في تونس و بما أن الغناية طويلة و فيها برشا معلومات (كيما الحال في كل غنايات الكونشيس راب)…

في الدقيقة 1:01 نسمعوا ڤيتو آن يڤول: “يڤحرولك كي تتعدى في يدك قارورة” ..
هاذي ماهياش عند المتشددين بركة.. اجتماعيا، الناس الكل تڤحر للعباد اللي يبدوا متعدين بالقارورة خاطر في المخيال الاجتماعي عنا مشكلة مع العباد اللي تشرب في الشارع بأنهم مصدر خطر..

في الدقيقة 1:33 يڤول على السلفيين: ” اليوم وين فهمنا علاش الزين كان قامعكم”…
صحيح السلفيين و خاصة الجهاديين منهم عنده مشاريع هدامة، أما زادة من اللاإنساني إنك تبرر قمع النظام السابق ليهم مع علمنا بطرق التعذيب اللي كانت تتمارس عليهم…

في الدقيقة 3:05 فما جملة: “درابويا نجمة و هلال درابوك درابو طالبان”..
هنا فما خطأ تاريخي، الراية اللي يرفعوها السلفيين هي راية الرسول في عهده يرفعها في الغزوات…

موش بعيد برشا، في الدقيقة 3:15 : “و انت تحبها في سوريا تمشي تعطي بدنها”…
هنا إحالة على “جهاد النكاح” اللي وقع الترويج له في الأزمة السورية… أولا، ما فما حتى دليل على وجود هذا النوع من أنواع الجهاد غير بعض الفتاوى في التويتر (اللي كلنا نعرفوا ماهوش مصدر موثوق فيه)… ثانيا، الفيديو اللي توضعت في الكليب هي مرأة مقاتلة في الشيشان… هذي مشكلة خاطر تفسد المصداقية متاع الغناية و الفنان كيف يبدى ما عملش بحث قبل ما يكتب الغناية…

في الدقيقة 4:05 فما : “و إنت تحب دولة خلافة ما حكاش عليها الرسول”…
الرد ساهل يكون من عند السلفيين و حزب التحرير اللي يستشهدوا ديما على موضوع الخلافة بحديث الرسول اللي يوفى في الأخير بــ “ثم تكون خلافة على منهاج النبوة”…

عملنا لقاء مع Guito’n:

دقيقة ثقافة

Concious Rap:

يتفهم من الترجمة (الراب الواعي)، هو الراب اللي يركز على خلق نوع من أنواع الوعي و المعرفة.. في العادة الرابورات اللي يغنوا النوع هذا ينبذوا العنف و التفرقة و كل الأمراض الاجتماعية… الإقتناع الطاغي هنا هو أنه التغيير المجتمعي يجي من خلال معرفة الذات و المشاكل الدايرة بيها…

في العادة، الرابورات هاذوما يعتبروا مناضلين و مضاددين للأنظمة إلى درجة تقديم الحلول بعد تحليل الوضع من دون مشاعر و عواطف موش كيف الڤانڤستا راب العنيف اللي يلتزم كان بالشكوى من الأوضاع..

من أشهر الرابورات اللي يغنوا النوع هاذا من الراب نلڤوا: ناس، كانيي واست، پابلي إنيمي…

⬇︎ PDF