توفيق الجبالي : شَعْب واحد ما يكْفيش

أنا فهمت ياسر حاجات ، الحروبات اللي صايرة في المدّة الاخرة،فسّرتلي ياسر حاجات ماكنتش نعرفهم من قبل..
من خلال تجربتي المتواضعة مع “شريط الأنباء” فهمت اللي ….شعب واحد ما يكفيش
هوما البلدان اللي مازالوا كيف استقلوا ، توة توة البارح في الايام ، عندهم بالقليلة شعب والاّ اثنين
خلّي احنا اللي يقلّك أمّة عريقة وضاربة …في القدم…
حتى من البيوت المكيفة عندنا والله العظيم شيء يحيّـــــر هاذي حكاية شعب واحد …
تصوّر روحك راسك راس شعب …راس ورويّس…هذا اذا موش راس وذنبة…
وين تعرف على البلاوات انت ؟
أىّ سيدي مرض بالصفراء…غرق في مسكوكة…صبّط الشتاء ، تسدّت تعدّى من غاديكه ، تبلع …
كلا حكّة سردينة فاسدة …هانا تبيلكنا في شعبنا ويا شماتة البلدان الشقيقة والصديقة فينا …
واحنا لواش نطلّعوا في الماء للصعدة …مات في حرب مثلا …
لا في علمك لا في درايتك طامعين لك في شعبك ، فبركولك حرب بالعاني …أشبيك ياخي وين عايش ؟؟
تبدى مروّح في الكار سارح …مولى الشعب موش هوني …قاعد تخمم مثلا في الأجر الأدنى الفلاحي ويجيك هكّة يلصقك و “أوب” يسقطلك على شعبك …تجي هابط…تعمل هكّة…تضرب عليه ما تلقاه ….
واذا بيه من غدوة تسمع بيه يتهنكر في باليرمو والا هونج كونج …
بعد ما برقشوه وبدلولوا البلايك ، ونحاولوا هاك اللون الخرنتيتي اللى كنت انت عاملهولو…
بره عاد شوف لشكون تشكي …يزيك قالوا الأمم المتحدة …يرزيك فيها عمّـــــــــا قريب
وهوما يأمنونا …مازال حد يأمنا ، يقلّك الساعة بادىء ذي بدء …اشنوما الدّلائل والقرائن والبراهين الليّ هو شعبك ؟؟
آش باش تقلهم تراه ؟؟ تقلهم هوكه …شعرو معكرش وعندو الشهامة خارجة من وذنيه …اوه على الشهامة متاع وذني محسوب هاو توة في لحظة نهبط نجيبلك خمسين شعب شعرو معكرش وعندو الشهامة خارجة من خناخشو كان تحب …
“يا اولادي علاش هكّة الشماتة اسألوه هوكة قدّامكم ” …
ـ يا أخ من فضلك ما تحشمنيش قدّام الأجانب موش انت شعبي بأمارة اللّي …..
يهزّك ويحطّك بكل محقرانية قال شنوة اشكونو ها الدرويش اللي مطيّح معايا حرف الياجور وانا مازلت ما قعدتش راسي بوحدة ديراكت ؟؟
نستاهلو قد ما تلهينا ودللنا وعملنالو ملاعب معشّبة ومنحة العلوّش وجبنالو المسلسلات حتى من المكسيك …ريت اللى ما يقراش حساب غدوة …
بره عاد الواحد يقوم يدبّـــــك على روحو على الأقل يشوف حلّ استعجالي ، متاع شدّان يد…امّا خير والاّ يشبعوا فينا التجّار يبيعونا ويشريونا …واحنا مولى الدار موش هوني ؟؟
يلقاشي روحو زاده بنادم بشعب على أكتافو موش مطابق المواصفات المطلوبة ؟؟
هذا اذا ما لكدولكش سلعة (deuxieme main) معنتها خادم قبل ، يجيك مشلل من عقاب نظام شيوعي والاّ مائع ، ولد ناناتي ، مستانس بالرخاء متاع المؤسسات الديمقراطية وانت حاجتك بيه …فحل …لمعركة الخروج من التخلّف واللّحاق بالأمم المتقدّمة ، هذى مسألة رهانات موش متاع لعب …
ولذا يلزم الواحد يرد بالو ، يطلب فيه “قارانتي” على الاقل بعام مع التعريف بالامضاء ، ونزيدك زيادة ، ردّ بالك في حالة عطب تحلو انت بيدك …أحسن ترجع للدار …راو اذا كان شعب ما يتحلش في الدار يموت على مولاه القارانتي …
هو كيف تجي تشوف الحق ما خيرش من التطليع …ينعن بو الدنيا …يضربلها الواحد شعب فرشك ، جديد من قرطاسو…لا محالة التطليع يتكلّـــــف موش ما يتكلفش …امّا بربي بنادم قداش يعيش فيها من مرّة ؟
آش بيه خسارة فينا شعب يعمل الكيف ؟؟ يزينا ما تعذّبنا وتمرمدنا …
تبقى هوكه الواحد موش لازم يدهك عليه برشة …طباعي هكة وتزرزيق…خليه متاع رسميات…خرجة مناسبة وطنيّة…يجيش حدّ براني….نصففوه على الماده ونعطيوه هاك الدرابوات الصغار في يدو …
وندبروا من بعد شعبين …ثلاثة…متاع كل يوم…، نمشيوا بيهم مصالحنا وهوكة الواحد عينو ميزانو…
اللي نهبطوه للكورة ما نخليوهش يمشي للمهرجانات ، واللي متاع نهار الجمعة ما نكلفوهش بالبيرووات …أمّــــــالة ، التخليط …لا….
موش باهي لا ليهم لا لينا ، ماذابينا لا يقابلوا بعضهم لا يوليوا فرد عوايد وفرد تركيزة كلام وهيا وينك هواني ولا هم يحزنون …
حاجة ماسطة ياسر اذا بكلهم يجيهم النوم مع بعضهم ، ويفيقوا موخّر مع بعضهم ، ويؤيّدوا نفس القضيّة مع بعضهم .
هيا سيدى غلطولنا ذات شهر جانفي في القضية يسخايلوها هي وتطلع موش هي …آش نعملوا ؟ تضربنا الفشلة ونمشيوا نتسلفوا جمرة شعب من عند الجيران ؟؟
لا …لا…نخرجوا الشعب الحاضر اللّي بحذاه واقف يستنّى في طريقو…اللّي قضيتو جاهزة في يدّو …أمّـــــالة …
وأكبر غلطة نعملوها …نخليوهم يتفاهموا علينا ويتقاراوا علينا ، يلزم نفرقوهم على بعضهم بجميع الوسائل ، ماكنش راهم يدوروا علينا واذا داروا علينا وقتها اشنوة الفرق بينا وبين واحد عندو شعب واحد ؟؟ ما تجيش …
على خاطر” شعب واحد ما يكفيش “….

كتبتها:أرابيـكا
على الساعة 22:16
2008-09-14

http://fatma-arabicca.blogspot.com/