نحب نحكي ليوم على “كلمتنا” الوقفة الاحتجاجية إلي تعملت قدام رابطة حقوق الانسان في شارع محمد الخامس لبارح( إلي قالو 2000 راهم جايين وماجاو كان 200 تقريباً) ونحب نسال الشعب التونسي العظيم :ماعادش عندك كلمة؟؟ما عادش عندك ما تقول ؟؟ حققت إلي تحبو الكل م “الثورة “؟؟ إي عندك ألحق حتى نحنا ولينا نعيشو في ديمقراطية شي كبير بالعمل الحكومة الموطنة وعلى راسها السبسي تعمل إلي تحب وماتسأل  حد  هاو قروض ،هاو تأجيل الانتخابات ماهو قاللنا أنا من شاور حد.

وعندك ألحق يا شعبي كيف تسكت خاطر حاسبو إلي قتلو الكل ،حبسو الاشاعات الكل والشهيد ماعادش يعيط ويقول ‘نسيتو دمي؟؟’

رجعو لعلاش والنعاج وماتت الصيودة ،إي نعم نحكي عليك إنت يالي حطيت جاي وماجيتش،نحكي عليك إنت يلي ما عندك ماتعملوماجيتش توصل صوتك ،نحكي عليك إنت يلي مشيت بش تسكر وماخسرتش 15 دقيقة من وقتك بش تحكي كلمتك ،نحكي عليك انتي يلي رافض الوضع وقعدت تحضر لسامدي سوار وماجيتش ،نحكي عليك انتي يلي نهار الكل تتفرج فالاخبار وتسب في السبسي و متأسف على بلادك  وماجيتش.

يا نعاج رجعتو لعهد الخوف؟؟ رجعتو لظل بعلول؟؟ رجعتو لسياسة النعامة ؟؟؟

أنا عندي كلمتي نقلوها وصوتي نوصلو ونتي وقتاش ناوي تتكلم؟؟ مانا فالحين كان فالكلام أيا نتكلمو !! أيا نعبرو ،تونس بلادنا الكل ماهاش بلاد السبسي ولا المبزع وحدهم.

فلخر نحب نقول للي جاولبارح يعطيكم الصحة إلي وصلتو صواتكم وقلتو كلمتكم  وتونس برجالها ونساها راهو ما عاد يحكمنا حتى دكتاتور.

(تونسية بڤلبي )