تونسي؟عندك الحق في منحة دراسة بالخارج.

 كانت روحي تطلع وين نروح لتونس قبل الثورة، الناس تحكيلي على الكورة في كل محفل. امشي يا زمان ايجا يا زمان، أنا كبرت وبن علي تقلب، قلت سلكت. لكن صار الحديث على: وقتاش تعرس؟ تفرجت في فيديو الغنوشي؟ سمعت شقالو على الفايسبوك؟ مؤامرة … المهم، غفقت من البهامة الزايدة، وبما انني عن قريب بش نرجع نستقر في تونس الخضراء، قررت أن أفشي بالأسرار التي جعلتني اقتحم أكبر جامعات العالم بلوشي. أي نعم، بلوشي.

وهو كان من المفروض الخدمة هذه تقوم بها الدولة التونسية العتية. لكن كيف تنحى البوليس من وزارة التعليم العالي، جاء متصرف أعمال، ثم أتت الإنتخابات فانتظرنا جامعياً عملاقاً…ياخي جانا المنصف بن سالم. وبش ما نبالغوش، سعادته عمل إصلاحات جذرية في نظام التعليم البارك متاعنا: دخل دراسة الإقتصاد الإسلامي مثلاً، مع أنه لو تم تعيين صخر الماطري وزيراً للتعليم العالي لقام بنفس الشيء.

كما زرع سي المنصف الديمقراطية بين شباب الجامعة، حيث تم كسر الإتحاد العام طلبة تونس، والذي كان -مع دوره في تدوير القهاوي في البيفات وتخريج البطالة أصحاب اللسان الطويل- أحد منابر الكفاح ضد الدكتاتورية، وبعث الإتحاد العام التونسي للطلبة (موش الحاج موسى موسى الحاج، وزيدو لحية). ويقولوا، والله أعلم، أنه سيتم تغيير بعض فصول تاريخ تونس للتأكيد على مدى حبنا للعيش المشترك والتسامح، بإضافة أن أم بورقيبة يهودية.

لكن سي المنصف ما ظهرلوش أن شطر شهائد الجامعة التونسية تنجم تبلها وتشرب ماها، وحتى بش تعلقها عالحيط تحشم من كثر شبهها بشهائد التجمع. وطبعاً قليل من الأساتذة الجامعيين -إلي يضربو في شهرية مقبولة ويحوسو في العالم بش يقدموا بعض المعلومات المبسطة على تونس- رأوا أن هنالك بداً من الإجتماع حول برنامج وطني شامل يعيد هيكلة الجامعة التونسية. وكانك على الطلبة، الكلها طز حكمة. واحد يقرا في السياسة عند أستاذ لغة يسخايب روحه محلل سياسي. الآخر عنده استاذية إنجليزية ويوحل في “هاواريو” ويحب يولي أستاذ.

فحقيقةً، وإلى أن تتحسن الأمور، أختي العزيزة وخويا العزيز كان عندك رطل ذكاء في مخك، أنا نقلك: هج!

1. أولاً، وقبل الإستقواء بالخارج، كل مواطن تونسي في سن الخدمة العسكرية لازمو يتفقد صفحة برامج التبادل متع وزارة التعليم العالي. صفي وغربل، لكن إلي يلوج يلقى: 

2. ثانياً، خلية أحباء فريدم هاوس وكوكا كولا والمارلبورو الدزيري ينجمو يمشيو لأمريكا بلاش فلوس في إطار منحة الفولبرايت . هذه المنحة التي تقدمها وزارة الخارجية الأمريكية تخليك تعمل ماستير بوبلاش في أمريكيا (من هارفارد إلى قطع الرقبة سيتي)، وتزيدك شهرية. تنجم زادة تعمل عام في إطار بحثك متع الدكتوراه. طبعاً ما فماش قطوس يصطاد لربي، وهذا ما يسمى الدبلوماسية الناعمة. لكن، وإن أخذنا الشيخ أسامة كقدوتنا، ألم يستغل الأمريكان لتحقيق نصره على السفيات؟ امشي اقرا وانفع روحك، ومن بعد خمم إذا تحب تخدم معاهم، أو ضدهم، أو بعيد عليهم. تفتح فولبرايت ابوابها في الربيع، وحتى جوان. وكان قدمت في جوان 2013، حط في مخك أن الدراسة ستبدأ في سبتمبر 2014 (أي بعد سنة). بش تعرفوا أكثر إمشيو لاميديست في جهة ساحة باستور، وإميديست هو مثل المركز الثقافي البريطاني، أما متع الأمريكان. روحلنا بجاسوس متخبي عاد. هذا الرابط متع اميديست، أما راهو تاعب شوية، خدموا سويقاتكم .

3. ثالثاً، المملكة المتحدة سي ديجا الإمبراطورية، لكن مازالو يعطيو في المنح وكأنهم يحكموا في العالم. ولذا، دز تخطف وآش يهمك. قصة الدبلوماسية الناعمة تنطبق هنا ايظاً. مرادف فولبرايت عند الإنجليز إسمه شيفنينج، للماجستار ايظاً، وفتحت المسابقة ابوابها لسبتمبر 2013، لكن أبواب الترشح تغلق في ديسمبر 2012. عندك شهر في يدك. هاو الرابط  . ممكن تمشيو تستفسروا أكثر في المركز الثقافي البريطاني، على شارع محمد الخامس. غادي ممكن تلقاو منح أخرى ايظاً كان دخلتوا في الدكتوراه أو بش تدخلولها، على غرار الويدنفلد:  
هذه الخطوات الأولى التي يجب على كل تونسي أن يمر بها. توا نتعداو للي بعدو:

4. لأميديست عدة منح أخرى، متوفرة لفروخ المعاهد، لمن نجح في الباك، لمن دخل الجامعة ولمن خرج منها. إمشيو، واسألوا. منها منحة ياس (لجماعة 15-17 سنة، يعديو عام في معهد في الولايات المتحدة الأمريكية، مصادق عليه من وزارة التربية التونسية  ، أو المنحة التي أعشقها ولم يحالفني الحظ للإستفراد بها

6. توموروز ليديرز، أو قادة الغد. تمكنك هذه المنحة من الذهاب إلى واحدة من ثلاثة أحسن جامعات في الشرق الأوسط: الأمريكية في القاهرة، الأمريكية في بيروت، أو اللبنانية الأمريكية في بيروت. عام في وحدة من الثلاثة هاذم قد أربعة سنين في تسعة أفريل. يمول هذه المنحة برنامج ميبي، متع سمير ديلو ومحسن مرزوق. كانك خذيت الباك أو بش تاخذ الباك السنة، امشي لاميديست واسال. هاو البرنامج  .

7. إنشاء الله الإخوة إلي قاموا بغزوة سفارة الكفار نجمو يكتشفوا المنح التي يوفرها محتلو العراق وأفغانستان لشعب تونس. سفارة أمريكيا عندها جزء خاص ببرامج التبادل، التي تهم إلي يقرا ولي ما يقراش. تفضل 

8. فولبرايت لتعليم العربية. الأمريكان، من كثر ما عندهم ثقة في تعليمنا للإنجليزية، يهزونا نقريو عربية. أي والله، كانك قاري أو قارية إنجليزية ممكن تمشي تعدي عام تقري عربية في جامعة أمريكية. تنجم الحكاية ما تعجبكش، لكن فكر أنك في عام تنجم تربط خيوطك، وتنجم تكمل الدكتوراه متاعك غادي. لينا بن مهني ما مشاتش تعمل في فورماسيون مع السي آي آي، لكن كانت تعلم في العربية في بوسطن الباردة المسكجة. اسألوا على البرنامج هذا في سفارة أمريكيا 

9. سفارة اليابان. عندهم منح بالزاف.

10. جامعات سكندينافيا (كبرى جامعات السويد والنرويج والدانمارك): عادةً ما توفر منح دراسة. وصاحبي كانك أزرق تبدا تطيح فيهم بلندة وراء بلندة . 

11. كاوست. أقوى جامعة في ميدان التكنولوجيا المتقدمة في العالم العربي. عملها مصدر الوهابية بش يطير بها النفس، فصارت وكراً للإختلاط والتقدم، غالبية طلابها من آسيا وأمريكا اللاتينية. والسلفيين والمنقبات ممنوعين فيها (نحكي بالرسمي). يعطيو منح

12. معهد أوروبا. تعلم السياسة عند المستعمر 

13. هناك عدة صفحات مهمتها تجميع المنح، مثلاً بالنسبة للمملكة المتحدة  (لوج على تونس). 

14. كانك رياضي، في أي رياضة، وعمرك أقل من 25 سنة، أغلب جامعات أمريكيا يفرحوا بيك، لأن الرياضة في الجامعة الأمريكية كلعب البيلوت في الجامعة التونسية: مفخرة كل طالب. فما منحة اسمها سبورتس سكولارشيب (Sports Scholarship)، وهي التي تحصل عليها أسامة الملولي مثلاً. بربشو في انترنات، أو اسألوا في اميديست ايظاً.

15. أغلب المؤسسات التي تخرب في العالم أو التي تسلب أمواله، من بنك دولي إلى يونسكو إلى شال إلى غيرها (كل ماركة عالمية تجي لمخك) توفر منح دراسة، بالأخص لشباب العالم الثالث. هردونا، يحبو يكفروا على ذنوبهم، نقلولهم لا؟ ابحث عن مواقعهم على الانترنات.

16. وسكولارشيب (scholarship)، أو فيلووشيب (fellowship) أو فوندينج (funding)، أو فاينانشيال آيد (Financial Aid) هي كلمات لازم تحفظها. على خاطر، وهذه معلومة مفيدة، لازم تعرف أن تقريباً كل الجامعات الأمريكية، وجل الجامعات البريطانية، وكثير من جامعات العالم الكبرى، تعطي منحاً كاملة، وتكون المنحة تستنى فيك تحت أحد هاته المسميات. وسبب إعطاء المنح هو أن كل جامعة تبحث عن العولمة، لتبرز أكثر. المناخ الجامعي أحسن كي يتخلط، موش قطيع غنم من فرد رادسة. مثال، جامعة سواس في لندن  أو جامعة ماك غيل في مونتريال  . هذه الجامعات تعطي كذلك منحاً لمن “يساعد الأستاذ” (Teaching Assistantship)، وهو ما يعطيك تجربة في التعليم في نفس الوقت الذي تدرس فيه. على هذاك برشة توانسة يروحوا يفيسو بعد الدكتوراه ويقولوا كنا نقريو في أمريكيا: في الحقيقة، التدريس جزء من الدكتوراه، ملزومين بيه.

17. أغلب الذين يتم قبولهم في الدكتوراه في أمريكا وبريطانية يتحصلون على منحة. المنحة تجي مع القبول.

طبعاً موش معنتها بش تتفرج في المواقع هذه سايي، بش تاخذ المنحة. لا بابا، لازمك، خدمة. أما كانك تعدي ساعتين أو ثلاثة في نهارك قدام فايسبوك، يظهرلي تنجم تعدي ساعة تلوج على مواقع جامعات العالم وفرص الحصول على منحة. صحيح لازمك تكون قريت على روحك شوية في تونس، وعادةً لازم يكون عندك مستوى موش خايب برشة في الإنجليزية، وبش تعدي بعض الإمتحانات. لكن كان تعمل ستة أشهر من البحث المتواصل، تنجم توصل. من دون مبالغة، هناك الآلاف من المنح المتوفرة، وبحكم جنسيتنا اليوم اصبحنا محبوبين أكثر من ذي قبل.

يزي ما تركت بوك، يزي ما كركت في القهوة، يزي من الدلول متع الميزيريا. اقرا المقال، حرك روحك كان ما عملت شيء من الحاجات هذه، وأنشرها ولك الأجر. خيرلك من نشران الصابون والخرافات الفارغة…

هز رأسك، أنت تونسية. إرفع رأسك يا أخي، أنت عربي في زمن الثورات. جوانحك، نحو الشمس، وإرجع ضوي على بلادك قبل ما تتحرق.