الايامات هذي كثرت حبوب الهلوسة من عند الحكومة ،كل يوم حريبشة جديدة :هاو انفلات أمني ،هاو فرار مساجين هاو القاعدة الحاصل الشعب ما عاد فاهم شي ومع عادش مركز مع إلي قاعد يصير برسمي على الساحة السياسية.وتوا بدات تظهر النية المبيتة من هالفيلموات الهوليوودية الكل،هام طلعولنا بطلعة تأجيل الانتخابات بتعلات تقنية واهية ،قالك الهيئة ماتنجمش تعمل الانتخابات في الوقت الضيق ألي مازال ،هو كي تجي تشوف عندها ألحق على خاطر الحكومة عملت مجهودات جبارة بش تأجل الانتخابات ومانجمش نلومها على خاطر الكرسي حلو وكيف تتوفرلها فرصة بش تزيد تقعد فيه 5 شهر أخرى تعمل المستحيل .خلي نحكيو شوية على الانتخابات إلي داخلة في حيط برسمي (الشعب التونسي يموت عليها هالكلمة).واحد يقول بش توخر وواحد يقول لا للتأجيل،حوس تفهم حصيلوا يلعبوا بنا كل دقيقة قرار (فالاخر بش تلحم البونية هه) ،ظاهرلي كان مشينا عملنا إنتخابات في لامبدوزا خير على القليلة مافيهاش تجمع وديناصورات. باهي توا نجيو للمصيبة الكبيرة: ڤمة الثمانية (عفوا نقصد قمة الثمانية) إلي من خلالها الوزير الأول الموقر بش يبيع لبلاد ،إي نعم بش يبيع تراب تونس بقيمة 25 مليار ،إي علاش لا هاذيكة الحاجة الوحيدة إلي مازال مابعنهاش،بعدى بعنا ذمتنا ووطنيتنا و دمنا ،شقعد؟؟ طرف تراب برى كمل بيعوا فماش مايجبلنا سوم باهي،الدنيا والفلوس. أنا إلي قلقني في هذا الكل إنو سي الباجي مظربش ظربتو،كان ينجم يجيب أكثر من هكاكة ببرشة خاصة وإنو قال إلي لفلوس هذي لازمة للإقتصاد (معناها الشعب الكل يقعد و يرتاح حتى واحد معاد يخدم هاو لفلوس هذي بش تعوظلنا الخدمة حالا معنا يا شعب زيد أرقد و ارتاح) . كارو كمل باع الشعب فرد مرة راهو جابلو سوم عالمي: شعبنا صفقة رابحة ماداموا يسمع لكلام وديمة راقد ومايقلقو شي ويصدر كل شي للغرب (حتى الثورة صدرها و ماعملهاش). أيا شكون يشري شعب  للبيع ،يا ج 8  اعطيو سومكم

!!!

تونسية بڤلبي