المقالات المنشورة بهذا القسم تعبّر عن رأي كاتبها فقط و لا تعبّر بالضرورة عن رأي نواة

مرحبا بكم في تونس ما بعد ‘الثورة ‘ (كلمة نستعملها باحتراز شديد)الحكومة المؤقتة إلي معمولة لتسيير الأعمال عملت عمايل في البلاد والعباد.الحاكم حاميها حراميها الحاصل حالا معنا لاقصى درجة

كان خلينا كالمكبوب بن علي خير.اجا نعمللكم حوصلة علي قاعد يصير : الحكومة المزفتة(مهاش مؤقتة على خاطرها ناوية توطن) هي الدكتاتورية الجديدة إلي تحكم فالبلاد ،إي نعم دكتاتروية،ياخي بجدكم تسخايلوها تنحات وولينا نعيشو في ديمقراطية وحقوق إنسان؟؟؟؟طز(كما يقول ملك ملوك سلاحف النينجا).القمع رجع أقوى :تي حتى في عهد بن علي الحاكم ماضربش لبنات كيما قاعد يصير هاليامات،أي مسيرة سلمية يصير فيها ضرب ومتراك وغاز ،حتى لعباد إلي قاعدة في القهاوي لا عاملة مسيرة لا هم يحزنون ما سلمتش .القعاد في قهوة ولات جريمة يعاقب عليها الحاكم بالمتراك ولكريمو البريمي ههه والله كثر الهم يضحك.

في إطار التمشي الاصلاحي متاع الحكومة الموقرة القبض على الإشاعات الكل ،ألحق ماقصروش اثبتوا بالدليل القاطع إلي ما فماش قناصة والعباد إلي ماتت الكل تكذب وتفلم ،وشدت الطرابلسية والسراق الكل وعملت بطاقة جلب حقانية لبن علي فالانتربول.تبركالله عليها تخدم في خدمة جبارة واحنا ظالمينها.

باهي من مكتسبات الثورة زادة نوع جديد مالعباد انا نسميهم جماعة الحيط ،هذومة خدمتهم الوحيدة هي التعليقات من نوع بش دخلوا لبلاد في حيط ويزيو مالفتنة وخلي الحكومة تخدم وطيحتوا الاقتصاد وكالغة حصيلوا يحطوهم في كل باج ثورية على الفايسبوك وزادة تسمعهم فالشارع وعند العطار،أنا ملول قلت هاذم جماعة القبة ولا الأغلبية البكوشة ياخي الشيء كثر بصفة غريبة وبعد مدة إتضح إلي جماعة التجمع ولا حكومة الظل(المجهول) عاملة عباد تخلص فيهم بش يعملوا لحكاية هاذية.ههه احنا عندنا عباد بطالة بشهايدها ومش لاقية تخدم ولا تاكل والحكومة والتجمع يخلصوا في عباد بش تحكي وتفتن يا والله حال .

و آخر المستجدات هالايمات سي عمار 404 إلي رجع يخدم ويعمل في سوايع زايدة زادة: أيا ودعوا الشبح متاع حرية التعبير !!! في تونس بلد الأمن والامان تحل فمك المحكمة العسكرية تهبط فيك بيان .

تونس ما بعد التحوير الرئاسي(ماعملناش ثورة) هي بلاد القمع البوليسي بصفة أولى: تتكلم تاكل المسبط،تعبر على رايك تشبع بالغاز ،تطالب بحقوقك تمشي تعدي إقامة في دار خالتك،محلاها العيشة فيك يا تونس!!ماكذبش إلي قال تونس بلاد البوليس!! إي من غير ماننسى الأحزاب إلي يعطيها الصحة قاعدة تخدم وواقفة مع الشعب وتساند في مطالبو الشرعية نحب نقوللهم نشالله يرجعلكم في الافراح والمسرات.

عاشت تونس بلاد الغاز والمتراك ،عاش التجمع وحكومة الديناصورات والظل ويموت الشعب!!!

(تونسية بڤلبي)